الاثنين، 1 مارس 2010

رابعة حاسب ألي

سنه غير أي سنه ( 6 أمتياز ، 1 جيد جدا ) والأولى بجداره


الخميس، 14 يناير 2010

الجمعة، 1 يناير 2010

الخميس، 31 ديسمبر 2009

Good Buy 2009

بجد كانت سنه جميله أوي .. الله يرحمها
كانت كلها سعاده مكنش فيها حزن الحمد لله
1- عدد كبير من أقاربي اتجوزوا كل اللي مكنش لاقي يتجوز اتجوز الحمد لله .
2- الحدث الأعظم ببأه وهو خطوبه أختي الكبيره 14/2/2009 .
3- جوازها 11/6/2009 .
4- مصيف ( مرسى مطروح ) 17/7/2009 .
5- بس تقريبا هي دي الاحداث الجميله في 2009 مش اكتر من كدا بس ممكن أضيف تحسن حاله نادي الزمالك ( ربنا يحميه ويحفظه من العين يارب ) طبعا مكنتش عاوزه اكتب الخبر ده بس علشان خاطر بابا ميحرمنيش من الميراث .

الأربعاء، 19 أغسطس 2009

رمضان كريم



كل عام والامة الأسلامية بخير
بمناسبة حلول شهر رمضــــان المبارك
أعاده الله علينا وعليكم بالخير واليمن والبركات
وتهنئة بأسمي :
لكل المدونين عامة ولزوار مدونتي خاصة

الجمعة، 7 أغسطس 2009

كل سنة وأنا طيبة


كل سنه وأنا طيبه

ويارب السنه الجايه

اكون إلى الله أقرب وعلى طاعتة أدوم وعن معصية أبعد

واكون محققه كل الاماني والآمال


الثلاثاء، 7 يوليو 2009


الساعه ( 12 ظهرا )
تررررن ترررررن ترررررررن ( ده طبعا صوت جرس التلفون )
أنا : ايه ده دي نمره غريبة اما أرد
المتصل : ألو
أنا : السلام عليكم ... مين معايا ؟؟؟
المتصل : أزيك يا ريم أنا عمو
انا : أهلا أزيك يا عمو .. حضرتك عامل ايه .
عمو : تمام الحمد لله .. أنتي ازيك عامله ايه .. وازاي بابا وماما .. جيبلك خبر بمليووون جنيه
أنا : ايه هو
عمو : النتيجه
أنا : ان ان ااااااااااان
( ايه ده ... اخص عليك يا عمو مقولتليش قبليها ليه كنت صليت ركعتين حرام عليك والله يا عمو ) في سري طبعا الكلام ده
عمو : بصي يا ستي طبعا انتي قليتي عن كل سنه
أنا : بردو في سري ( ينهر ابيض .. يارب استر يارب .. هو يوم باين من اولو .. ربنا يستر يارب )
عمو : مقبول
أنا : مقبول ايه يا عمو أحنا نسينا كلمة مقبول دي من سنه اولى كليه
عمو : والله العظيم مقبول
أنا : لا يا عمو بتهزر بتهزر انا عارفه
عمو : بهزر ايه يا بنتي والله العظيم مقبول
أنا : هو ايه ده اللي مقبول يا عمو بالظبط ؟؟
عمو : ماده مقبول وسته مواد
أنا : ها يا عمو ستة مواد ايه
عمو : ستة مواد ممتاز
أنا : ( طبعا بعد ما اطمأنيت وهديت ) إيه يا عمو .. مده العادي بتاعي .. ده اقل حاجه عندي .. يعني هو حضرتك كنت فاكر ايه
عمو : يا بنتي بطلي انتي كنتي بتموتي دلوقتي
انا : بموووت ليه يعني ؟؟ يا عمو دي كليه هبله .. ومواد عبيطه .. وانا كنت واثقه اساسا .. ويا عمو انا اصلا مبذكرش .. أمال بأه لو ازاكر هعمل ايه .. تخيل كدا معايا يا عمو وانا مبزكرش عملت كدا لو زاكرت بأه ايه اللي هيحصل هقعد الداكتره والمعيد في البيت بس يله بأه انا سيباهم يكلو عيش غلابه بردو
عمو : يا شيخه
انا : أه يا عمو امال ايه .. هو احنا شويه ولا ايه
عمو : ألف ألف الف مبرووووووك ياريم وعقبال يارب لما أجبلك نتيجة سنه رابعه واقولك كمان انك متعينه
أنا : شكرا يا عمو ربنا يخليك يارب وتجبهالي كدا على طول مش على طول يعني لحد السنه الجايه
عمو : مع السلامه
أنا : مع السلامه
مش حرماكوا من حاجه اهو نقلتلكوا المكالمه التلفونيه بالكامل
الخلاصه :
أني نجحت وجبت 6 أمتياز وماده مقبول والتقدير العام ممتاز وبس ...




الأحد، 12 أبريل 2009

...(مكافأة التفوق )...



بما أننا في شهر إبريل !!!


شهر 4 يعني !!!


المعهود والمعروف دوليا وعالميا أني في الشهر ده بأخد مكافأة النجاح الخاصة بي


على فكره ( أنا عارفه أنكوا فاكريين كويس لان حاجه زي دي متتنسيش .. بس انا قولت أفكركوا تاني يمكن تكون تاهت من حد ولا حاجه )


بس السنه دي غير خالص ... أزاي بأه ... بصو ازاي :


أولا :علشان أخد المكافأة لازم اتكرم وأتعطف واروح لكنترول الكليه واجيب ورقة بتقديراتي عن العام السابق وطبعا عليها امضة مدير الكنترول


تانيا : أدفع مصاريف الكلية اللي هي اغلى من المكافأه نفسها 167.50 جنيه ( طبعا النص قبل ال 167 طبعا )


ثالثا : اتنازل واتواضع رغم انفي واكتب ورقة بالسماح لي بصرف المكافأه وعليها أمضة البشمهندس عميد الكلية وأمين الكليه طبعا ( ومش أي ورقه لا ... أحنا هنهزر ولا ايه ؟؟ لازم تبقى ورقة مطبوعة على الكمبيوتر وعليها شعار جامعة بنها وطبعا شعار كليتنا المبجل )


رابعا : أجيب اتنين شهود معايا ( يشهدو طبعا اني جبت تقدير امتياز السنه اللي فاتت .. أمال ايه .. مش ده مال دولة بردو )


خامسا : والأهم والأهم بأه أني مش هاخد الملاليم اللي ختها السنه اللي فاتت لا .. لا طبعا .. السنه اللي فاتت كنت جايبه تقدير جيد جدا أما السنه دي فأنا جايبه تقدير ممتاز يعني خير ربنا هيزززززيد


وهاخد


هاخد


120 جنيه



ملحوظه :

طبعا مش هفكروا انا اللي هيرد على البوست ده ليه نصيب من المكافأه زي السنه اللي فاتت بالظبط بالظبط ..

الاثنين، 2 مارس 2009

ن ج ح ت





نجحــــــــــــــــــــــــت


ايوة أنا نجحت


والله نجحت


الحمد لله




وبقول لكل حبايب قلبي عقبالكم يارب .


أقول مبروك لنفسي ولكل الناجحين .


الحمد لله نجحت وجبت تقدير ممتاز وترتيبي الثانيه على الدفعه .


وتقديراتي كويسه أوي اوي الحمد لله






Excel ممتاز


Access ممتاز


English ممتاز


أصول تربيه ممتاز


window جيد جدا


مناهج وطرق تدريس جيد جدا


سيكلوجية علم النفس جيد جدا






أبارك لجميع الأصدقاء والزملاء وحبايب القلوب بالنجاح


وأرسل إليهم أشواقي وتحياتي لهم جميعا .


مبارك عليكم النجاح ،


ومن نجاح إلى نجاح بإذن الله .


الاثنين، 23 فبراير 2009

اعز أصحاب




ص : الصدق


د : الدم الواحد


ي: يد واحدة


ق: قلب واحد




بجد دول احلى كلمتين قرأتهم في حياتي ( الصديق )



ودي اكتر معاني بتنطبق على أصدقائي


انا دلوقتي واصدقائي بنعيش في اجمل ايام حيتنا


اصدقائي بجد دول أحلى حاجه في الدنيا كلها


هما حياتي وفسحتي وسعادتي وكل حاجه


أحنا السته مع بعض في كل حاجه


نتفسح، نخرج، نروح، نيجي، نتكلم، نضحك ....




بجد من كتر حبنا بلمتنا مع بعضنا مش بنبقى عاوزين نروح البيت ،هنروح ليه ونسيب بعض ؟؟


على طول بحس واحنا مع بعض ان أحنا أطفال بنات كدا لسه صغيريين عندنا بتاع عشر سنين




بحب اوي واحنا مجانين وبنعمل حاجات مجنونه


بحب اوي لما نسيب المحاضرات ونقعد نلعب مع بعض


بحب اوي رستنا احنا السته على مدرج واحد واحنا قعدين في المحاضره ( ده لما بنحضر يعني )


بحب اوي اوي اوي اليوم اللي بنتجمع فيه في سكشن واحد يااااااه بنجنن المعيد


بحب اوي المكان المخصص بتاعنا اللي بنتجمع فيه ( وياويل بأه لو لقينا حد فيه بيبقى نهارو مش معدي )


بحب اوي لما النتيجه تتعلق وكلنا نبقى بنطمن على بعض ونشوف نتايج بعض


بحب اوي لما نزعل من بعض اصل احنا مبنلحقش نزعل بتلاقينا اتصالحنا في ثانيه
بحب اوي قبنا ان لما حد يزعل وحده مننا بتلاقينا كلنا زعلنا منو مش هي لوحدها اللي تزعل منو




ياااه بجد اصحابي دول احلى واجدع اصحاب في الدنيا .. يارتني كنت عرفتهم من زمان ؟؟


ودي بأه أحلى حاجات فينا ...


بنفهم بعضنا من نظرة عين و مش محتاجين لكلمتنا
وفي وقت الفرح بتلاقينا فرحانين وكلنا بنشارك فرحتنا
و اما بنتكلم نفضل نحكي ونحكي و مفيش حاجه تسكتنا
نفس الافكار والمعاني

وشئ قدرى الى مجمعنا
و يا رب مفيش ولا حاجه فى يوم تيجى تفرق لمتنا
انا و هم اعز اصحاب و انا مبسوطه اوى من صحوبيتنا



لو واحده فينا فى ازمة التانين يشيلو الاحزان منها
تلقى الحزن مالوش لازمة و ترجع تفرح غصب عنها
فى الفرح اوام نتلم
ما نشيل للعالم هم
و مفيش حاجه تفرقنا او من صحوبيتنا اهم
و يا رب متبعدناش عن بعض ولا تقل معزتنا

الأربعاء، 28 يناير 2009

**** أجازه ****




خدت اجازه خدت اجازه خدت اجازه.............
والاجازات ايامها لذاذه وخدت اجازه



وانت يا هذا قولى يا هذا اخدت اجازه؟؟؟؟؟؟؟؟؟
يلا جاوبوا على الاستاذه



الأربعاء، 31 ديسمبر 2008

HaPpY NeW YeAr



أكششن

أخر بوست فى 2008


دقائق معدودة.. , و نتسدل الستارة عن عام كامل
2009

كل سنه وأنتم طيبين وسنه جديده جميله يارب علينا كلنا ..سنه راحت وسنه جت والعمر بيفوت وهنتحاسب على عمرنا ..يارب تكون السنه الجديده الحلو فيها أكتر من الوحش لان الدنيا يوم حلو ويوم وحش


وكل واحد يحاسب نفسه عمل أيه ويشوف حصاد السنه اللى فاتت أيه اللى وحش وأيه اللى حلو ..ويشوف السنه الجديده هيعمل أيه وخطواته ناحيه ربنا وناحيه أحلامه هتمشى أزاى ..ولازم رغم كل اليأس كلنا نبدأ السنه الجديده بأمل وتفاؤل ان شاء الله

ويارب كل واحد يحقق كل حاجه بيتمناها فى السنه الجديده أو على الأقل يمشى خطوه
ناحيه أحلامه

يله اشوفكم بأه السنه الجايه

2008-2009
HaPpY NeW YeAr

الأحد، 28 ديسمبر 2008

أمتحانات.. أمتحانات.. أمتحانات



سأضطر إلى الغياب بسبب ( أعوذ بالله من الشيطان الرجيم ) الامتحانات
عندي امتحانات يا ناااااااااااااااااس .. يااااااااااااااااااارب استرها ..
الدعوات بقى لغاية ما أخلص امتحانات وأجي ..

حالة طوارئ وغياب من 13/1 إلى 29/1


الأحد، 7 ديسمبر 2008

كل عام وانتم بخير ......


كل عام وانتم الي الله اقرب
تقبل الله منا ومنكم صالح الاعمال

الجمعة، 5 ديسمبر 2008

سجل يا تاريخ ...




سجل يا زمان ، سجل يا تاريخ ، غريدي يا طيور ، ازهري يا زهوووور


لأول مره Miss : Reeman

Miss اه طبعا Miss إيه مش عجبكم ولا ايه ؟؟


أحساس جميل وشعور رائع جدا وأنا أستاذه كدا ومتحكمه في تصرفات فصل كامل ، كأني مدرسة المادة تماما

أحساس جميل أوي أوي لما ألاقي نفسي بشرح لحد

يااااه

دأنا طول عمري بيتشرحلي .. أخيرا جيه اليوم اللي مفروض اشرح فيه لحد

وأبقى مسئوله عن المعلومات اللي بشرحها لأنها هتكون مستقبل الحد اللي بشرحلو


أخيرا جيه اليوم اللي اقف كدا قدام السبوره وأتحرك وأروح وأجي وأمشي مابين ديسكات الطلبه ، وأقول لدي اسكتي ، ولدي عيب

ولدي غلط


بجد بجد كان يوم جميل أوي أوي

يوم التربيه العملي ده اللي شرحت فيه


مكذبش عليكم أنا في الأول كنت مرعوبه جدا جدا ، أول مدخلت الفصل حتى اصدقائي قللولي أهدي علشان متنسيش اللي مذكراه

المهم بأه أول مبدات كنت عماله أضحك مش عارفه على ايه ، وبعد شويه كدا لما بدات أكتب على السبوره كانت ايدي بتترتعش بردو مش عارفه ليه ..


اليوم ده أنا عمري مهنساه لأنو كان يوم جميل اوي وبالذات بالذات لما الطالبات كانو بينادولي ويقولولي يا miss يا miss ولو سمحتي يا miss وحضرتك .. كلام كدا حسيت انو كبير كبير



بس كدا








الاثنين، 29 سبتمبر 2008


كل

عــام

وأنتـــم

بخيـــــــر


الثلاثاء، 26 أغسطس 2008

اللهم بلغنا رمضان !!!



ماهي الا أيام قلائل ،حتى تكتمل دورة الفلك ويشرق على الدنيا هلال شهر رمضان المبارك الذي تهفو اليه النفوس المؤمنين وتتطلع شوقآ لبلوغه لتنتظم في جامعته الكبرى التي تفتح أبوابها في عام لتستقبل افواج الصائمين من كل أرجاء المعمورة.

سنستقبل رمضان بعد أيام ليعيد للقلوب صفاءها وللنفوس اشراقها وللضمائر نقاءها .بعدما تكدرت بفتن الحياة وزحام الدنيا وتلوثت بالنزوات العابرة .

فجاء رمضان ليبعثها من رقاد ويوقظها من سبات

عجبآ!!!

كنا بالآمس نودع شهر رمضان الماضي وكأن صفحاته قد طويت قبل أيام واليوم نستقبله أناوأنت والمسلمون بعد مرور عام

!!!عام مضى ذهبت لذته وبقيت تبعته نسيت أفراحه وأتراحه وبقيت حسناته وسيئاته

أمنية غالية كان يتمناها النبي ويسأل ربه أن يبلغه اياها انها نعمه بلوغ شهر رمضان

فقد ورد عنه أنه كان يقول( اللـــــــــهـــــــــــــم بارك لنا في رجب وشعبان وبلغنــــــــا رمضــــــــان)
ابشر نفسي وابشركم بقرب مجيى الشهرالكريم

ذلك الشهر الذي هو من افضل الشهورتتنزل فيه الرحمات

وتغفر فيه الذنوب والسيئات

وتفتح فيه ابواب الجنان

ويزين الله كل يوم جنته لعباده المومنين

وتغلق فيه ابواب النيران

وتصفد فيه الشياطين فيه ليله خير من الف شهر

شهر تضاعف فيه الحسنات

ولله عتقاء من النار وذلك كل ليلة من رمضان

فللهم سلمــنا الى رمضان وسلم رمضان لنا

شــهر هذه خصائصه بأي أي شي نستقبلة؟

بالانشغال باللهو وطول السهر على المسلسلات والفلام؟!

ام بخروج الى السوق والزيارات

ام يكون نوم بنهار و سهربالليل


فبمناسبة قدوم شهر الرحمة والغفران

والعتق من النيران

احببت ان ابارك لكم بقدومه

والله يجعله خير على الجميع

كنتم خير اعوان

ومازلتم خير اخوان

وكل رمضان وانتم في نعمة وتوبة وغفران

ارجو من الله الباري المنان

ان يرزقنا التقوى والاحسان

وان يمن علينا بالعفو والغفران

ويعتقنا من النيران

ويجمعنا سويا في اعلى الجنان

فصوما مقبولا وافطار شهيا ...

الجمعة، 8 أغسطس 2008

happy birth day to me




اليوم : الجمعة
التاريخ : 8/8/2008
الساعه : 10.30 صباحا
التاريخ الهجري :7 من شعبان

في مثل هذا اليوم كان عيد ميلادي…

بس كان
اليوم : السبت
التاريخ : 8/8/1988
الساعه : 10.30 صباحا
التاريخ الهجري : 23 من ذي الحجه


اتممت العشرون عاما ..
واعلنت بدايه الواحد والعشرون عام ..
مودعه عام بكل مايحمل من ذكريات سعيده كانت أو حزينه..
لأستقبل عاماً جديداً…
تبدو لي بدايته سعيدة جداً..


بينما كنت أرى الساعه تتحول الى يوم جديد..
أو لأكون أكثر دقه سنة جديده..


اخترق مسامعي أنغام أغنية عيد ميلاد تردد في أذني …

واستقبلت كم هائل جدا من رسائل الميل والموبايل ...

الأحد، 27 يوليو 2008

ممتاز مش جيد جدا !!!!

بصو بأه
في الأول كدة نهدي ونصلي علي النبي
لأن فيه خبر مهم جدا جدا
أنا يمكن لحد دلوقتي مش مصدقه نفسي
تاني حاجه كلنا خدنا في المدرسه في مادة الكيمياء تحديدا ( واحنا في اوله تانوي علشان محدش يقولي انا كنت أدبي )
ان فيه معادله مهمه أوي بتقول ايه :
ان حمض + قلوي = ماء + ملح
وملحه في عين اللي ما يصلي على النبي
معلش بأه استحملوا شويه أنا عارفه أنكو مش بتحسدوا ولا حاجه بس نعمل ايه الاحتياط واجب بردو
المهم بأه ايه
أنا كنت في البوست اللي فات بقول أني انا نجحت وجبت مش عارفه كام أمتيازه على كام جيد جدا
لا .. لا
أنا أنهرده جبت الخبر الاكيد
طازه من الكليه طازه
انا وإذ ذات فجأه ببص كدا
ولا كان على البال ولا على الخاطر
لقيتني جيبه تقدير
ممتاز
ايه ده !! بجد اللي بتقوليه ده ؟؟
اه والله
انا فعلا جبت تقدير امتياز وكمان 87.5%
شيفين أنتو المجموع ده انا جيباه في الكليه
انا مش فاهمه النمره دي ليه ملحقاني في كل مكان
مش عارفه أخلص منها خالص
وأنا في تانيه تانوي كنت جايبه الرقم ده بالظبط
ولما رحت تالته تانوي جبت 86.5% قولت الحمد لله النحس فك والرقم مشي
لقتني جيبه بالمستوى الرفيع 87.5% بجد فعلا الرقم ده غريب اوي
مش عارفه هيتنيه لازق فيه لحد أمتى؟؟
المهم بأه ايه ؟؟
أنو مكنش مجموع محترم لما كنت في تانويه عامه
بس الحمد لله بأه محترم لما رحت الكليه
انا اول مشفت التقدير ده فرحت أوي اوي اوي
كدا خلاص اقدر أروح قسم حاسب ألي وانا مرتاحه
وكمان هاخد مكافأه النجاح 150 جنيه بدل من الملاليم اللي كنت باخدها وأنا جايه جيد جدا
يعني الخير هيزززززززززيد
بس كدا هو ده الخبر ...

الاثنين، 23 يونيو 2008

الخبر وصل !!!!

الصوره اكيد معبره جدا
الخبر هو ايه ؟؟
أني نجحت .. نجحت ... نجحت
وخلصت أهو ثانيه كلية ..
وخلاص هروح ثالثه
أنا المفروض كنت أستنى مقولش الخبر ده إلا لما النتيجه تتعلق في الكليه وأتأكد منها
بس خلاص لقيت زوار البلوجه عاوزين يعرفوا في اسرع وقت
علشان كدا انا قولت كفايه باه كدا .. وهنعلن عن الخبر السار
التقديرات بأه جايه اهي ...
لغه عربيه .... ممتاز
تصنيف .... ممتاز
أنتاج رسوم ... ممتاز
V.B.............. جيد جدا
اجهزه عرض ... جيد جدا
مبادئ تدريس ... جيد جدا
يعني نقدر اوي نقول التقدير العام .. جيدجدا
ونقدر اوي نقول أن أنا الثانيه على الدفعه ..
لسه بأه محتاره بين أن أنا أدخل (تكنولوجيا ) ولا ( حاسب ألي )
لسه مقررتش بس اول مهقرر .. أكيد هقولكم
ملحوظه : اي حد هيعلق على البوست ده يسيب بأه هدية النجاح ..
مش انتو وخدين مكافأه النجاح ولا هتنكروا...