الأربعاء، 31 ديسمبر 2008

HaPpY NeW YeAr



أكششن

أخر بوست فى 2008


دقائق معدودة.. , و نتسدل الستارة عن عام كامل
2009

كل سنه وأنتم طيبين وسنه جديده جميله يارب علينا كلنا ..سنه راحت وسنه جت والعمر بيفوت وهنتحاسب على عمرنا ..يارب تكون السنه الجديده الحلو فيها أكتر من الوحش لان الدنيا يوم حلو ويوم وحش


وكل واحد يحاسب نفسه عمل أيه ويشوف حصاد السنه اللى فاتت أيه اللى وحش وأيه اللى حلو ..ويشوف السنه الجديده هيعمل أيه وخطواته ناحيه ربنا وناحيه أحلامه هتمشى أزاى ..ولازم رغم كل اليأس كلنا نبدأ السنه الجديده بأمل وتفاؤل ان شاء الله

ويارب كل واحد يحقق كل حاجه بيتمناها فى السنه الجديده أو على الأقل يمشى خطوه
ناحيه أحلامه

يله اشوفكم بأه السنه الجايه

2008-2009
HaPpY NeW YeAr

الأحد، 28 ديسمبر 2008

أمتحانات.. أمتحانات.. أمتحانات



سأضطر إلى الغياب بسبب ( أعوذ بالله من الشيطان الرجيم ) الامتحانات
عندي امتحانات يا ناااااااااااااااااس .. يااااااااااااااااااارب استرها ..
الدعوات بقى لغاية ما أخلص امتحانات وأجي ..

حالة طوارئ وغياب من 13/1 إلى 29/1


الأحد، 7 ديسمبر 2008

كل عام وانتم بخير ......


كل عام وانتم الي الله اقرب
تقبل الله منا ومنكم صالح الاعمال

الجمعة، 5 ديسمبر 2008

سجل يا تاريخ ...




سجل يا زمان ، سجل يا تاريخ ، غريدي يا طيور ، ازهري يا زهوووور


لأول مره Miss : Reeman

Miss اه طبعا Miss إيه مش عجبكم ولا ايه ؟؟


أحساس جميل وشعور رائع جدا وأنا أستاذه كدا ومتحكمه في تصرفات فصل كامل ، كأني مدرسة المادة تماما

أحساس جميل أوي أوي لما ألاقي نفسي بشرح لحد

يااااه

دأنا طول عمري بيتشرحلي .. أخيرا جيه اليوم اللي مفروض اشرح فيه لحد

وأبقى مسئوله عن المعلومات اللي بشرحها لأنها هتكون مستقبل الحد اللي بشرحلو


أخيرا جيه اليوم اللي اقف كدا قدام السبوره وأتحرك وأروح وأجي وأمشي مابين ديسكات الطلبه ، وأقول لدي اسكتي ، ولدي عيب

ولدي غلط


بجد بجد كان يوم جميل أوي أوي

يوم التربيه العملي ده اللي شرحت فيه


مكذبش عليكم أنا في الأول كنت مرعوبه جدا جدا ، أول مدخلت الفصل حتى اصدقائي قللولي أهدي علشان متنسيش اللي مذكراه

المهم بأه أول مبدات كنت عماله أضحك مش عارفه على ايه ، وبعد شويه كدا لما بدات أكتب على السبوره كانت ايدي بتترتعش بردو مش عارفه ليه ..


اليوم ده أنا عمري مهنساه لأنو كان يوم جميل اوي وبالذات بالذات لما الطالبات كانو بينادولي ويقولولي يا miss يا miss ولو سمحتي يا miss وحضرتك .. كلام كدا حسيت انو كبير كبير



بس كدا








الاثنين، 29 سبتمبر 2008


كل

عــام

وأنتـــم

بخيـــــــر


الثلاثاء، 26 أغسطس 2008

اللهم بلغنا رمضان !!!



ماهي الا أيام قلائل ،حتى تكتمل دورة الفلك ويشرق على الدنيا هلال شهر رمضان المبارك الذي تهفو اليه النفوس المؤمنين وتتطلع شوقآ لبلوغه لتنتظم في جامعته الكبرى التي تفتح أبوابها في عام لتستقبل افواج الصائمين من كل أرجاء المعمورة.

سنستقبل رمضان بعد أيام ليعيد للقلوب صفاءها وللنفوس اشراقها وللضمائر نقاءها .بعدما تكدرت بفتن الحياة وزحام الدنيا وتلوثت بالنزوات العابرة .

فجاء رمضان ليبعثها من رقاد ويوقظها من سبات

عجبآ!!!

كنا بالآمس نودع شهر رمضان الماضي وكأن صفحاته قد طويت قبل أيام واليوم نستقبله أناوأنت والمسلمون بعد مرور عام

!!!عام مضى ذهبت لذته وبقيت تبعته نسيت أفراحه وأتراحه وبقيت حسناته وسيئاته

أمنية غالية كان يتمناها النبي ويسأل ربه أن يبلغه اياها انها نعمه بلوغ شهر رمضان

فقد ورد عنه أنه كان يقول( اللـــــــــهـــــــــــــم بارك لنا في رجب وشعبان وبلغنــــــــا رمضــــــــان)
ابشر نفسي وابشركم بقرب مجيى الشهرالكريم

ذلك الشهر الذي هو من افضل الشهورتتنزل فيه الرحمات

وتغفر فيه الذنوب والسيئات

وتفتح فيه ابواب الجنان

ويزين الله كل يوم جنته لعباده المومنين

وتغلق فيه ابواب النيران

وتصفد فيه الشياطين فيه ليله خير من الف شهر

شهر تضاعف فيه الحسنات

ولله عتقاء من النار وذلك كل ليلة من رمضان

فللهم سلمــنا الى رمضان وسلم رمضان لنا

شــهر هذه خصائصه بأي أي شي نستقبلة؟

بالانشغال باللهو وطول السهر على المسلسلات والفلام؟!

ام بخروج الى السوق والزيارات

ام يكون نوم بنهار و سهربالليل


فبمناسبة قدوم شهر الرحمة والغفران

والعتق من النيران

احببت ان ابارك لكم بقدومه

والله يجعله خير على الجميع

كنتم خير اعوان

ومازلتم خير اخوان

وكل رمضان وانتم في نعمة وتوبة وغفران

ارجو من الله الباري المنان

ان يرزقنا التقوى والاحسان

وان يمن علينا بالعفو والغفران

ويعتقنا من النيران

ويجمعنا سويا في اعلى الجنان

فصوما مقبولا وافطار شهيا ...

الجمعة، 8 أغسطس 2008

happy birth day to me




اليوم : الجمعة
التاريخ : 8/8/2008
الساعه : 10.30 صباحا
التاريخ الهجري :7 من شعبان

في مثل هذا اليوم كان عيد ميلادي…

بس كان
اليوم : السبت
التاريخ : 8/8/1988
الساعه : 10.30 صباحا
التاريخ الهجري : 23 من ذي الحجه


اتممت العشرون عاما ..
واعلنت بدايه الواحد والعشرون عام ..
مودعه عام بكل مايحمل من ذكريات سعيده كانت أو حزينه..
لأستقبل عاماً جديداً…
تبدو لي بدايته سعيدة جداً..


بينما كنت أرى الساعه تتحول الى يوم جديد..
أو لأكون أكثر دقه سنة جديده..


اخترق مسامعي أنغام أغنية عيد ميلاد تردد في أذني …

واستقبلت كم هائل جدا من رسائل الميل والموبايل ...

الأحد، 27 يوليو 2008

ممتاز مش جيد جدا !!!!

بصو بأه
في الأول كدة نهدي ونصلي علي النبي
لأن فيه خبر مهم جدا جدا
أنا يمكن لحد دلوقتي مش مصدقه نفسي
تاني حاجه كلنا خدنا في المدرسه في مادة الكيمياء تحديدا ( واحنا في اوله تانوي علشان محدش يقولي انا كنت أدبي )
ان فيه معادله مهمه أوي بتقول ايه :
ان حمض + قلوي = ماء + ملح
وملحه في عين اللي ما يصلي على النبي
معلش بأه استحملوا شويه أنا عارفه أنكو مش بتحسدوا ولا حاجه بس نعمل ايه الاحتياط واجب بردو
المهم بأه ايه
أنا كنت في البوست اللي فات بقول أني انا نجحت وجبت مش عارفه كام أمتيازه على كام جيد جدا
لا .. لا
أنا أنهرده جبت الخبر الاكيد
طازه من الكليه طازه
انا وإذ ذات فجأه ببص كدا
ولا كان على البال ولا على الخاطر
لقيتني جيبه تقدير
ممتاز
ايه ده !! بجد اللي بتقوليه ده ؟؟
اه والله
انا فعلا جبت تقدير امتياز وكمان 87.5%
شيفين أنتو المجموع ده انا جيباه في الكليه
انا مش فاهمه النمره دي ليه ملحقاني في كل مكان
مش عارفه أخلص منها خالص
وأنا في تانيه تانوي كنت جايبه الرقم ده بالظبط
ولما رحت تالته تانوي جبت 86.5% قولت الحمد لله النحس فك والرقم مشي
لقتني جيبه بالمستوى الرفيع 87.5% بجد فعلا الرقم ده غريب اوي
مش عارفه هيتنيه لازق فيه لحد أمتى؟؟
المهم بأه ايه ؟؟
أنو مكنش مجموع محترم لما كنت في تانويه عامه
بس الحمد لله بأه محترم لما رحت الكليه
انا اول مشفت التقدير ده فرحت أوي اوي اوي
كدا خلاص اقدر أروح قسم حاسب ألي وانا مرتاحه
وكمان هاخد مكافأه النجاح 150 جنيه بدل من الملاليم اللي كنت باخدها وأنا جايه جيد جدا
يعني الخير هيزززززززززيد
بس كدا هو ده الخبر ...

الاثنين، 23 يونيو 2008

الخبر وصل !!!!

الصوره اكيد معبره جدا
الخبر هو ايه ؟؟
أني نجحت .. نجحت ... نجحت
وخلصت أهو ثانيه كلية ..
وخلاص هروح ثالثه
أنا المفروض كنت أستنى مقولش الخبر ده إلا لما النتيجه تتعلق في الكليه وأتأكد منها
بس خلاص لقيت زوار البلوجه عاوزين يعرفوا في اسرع وقت
علشان كدا انا قولت كفايه باه كدا .. وهنعلن عن الخبر السار
التقديرات بأه جايه اهي ...
لغه عربيه .... ممتاز
تصنيف .... ممتاز
أنتاج رسوم ... ممتاز
V.B.............. جيد جدا
اجهزه عرض ... جيد جدا
مبادئ تدريس ... جيد جدا
يعني نقدر اوي نقول التقدير العام .. جيدجدا
ونقدر اوي نقول أن أنا الثانيه على الدفعه ..
لسه بأه محتاره بين أن أنا أدخل (تكنولوجيا ) ولا ( حاسب ألي )
لسه مقررتش بس اول مهقرر .. أكيد هقولكم
ملحوظه : اي حد هيعلق على البوست ده يسيب بأه هدية النجاح ..
مش انتو وخدين مكافأه النجاح ولا هتنكروا...

الثلاثاء، 10 يونيو 2008

..............................

انا بجد نفسي اكتب بوست جديد
بس مش عارفه أكتب ايه ؟؟
سبحان الله وانا في الأمتحانات الأفكار والمواهب بتظهر وببقى عاوزه اسيب المذاكره واكتب .. تخلص الأمتحانات والدراسه وتبدأ الأجازه من هنا والغباء يحل .. حاجه غريبه فعلا
بصراحه ايام الدراسه ( في طبعا فرق بين ايام الامتحانات وايام الدراسه ) ...احسن بكتير من أيام الأجازه الممله . يلى الحمد لله يمكن الأيام الجايه من الأجازه تكون أفضل ..

السبت، 24 مايو 2008

أخيرا وبعد طووول أنتظار ...



خبر ســــــــــــــــــــار


لكل سكان جمهوريه مصر العربيه وجميع الأقطار العربيه واللي مش عربيه المجاوره واللي مش مجاوره ..

الخبر هو كالأتي :

تعلن صاحبة المدونه على أنها

قد........

قد أنتهت .....

قد أنتهت Reeman...

قد أنتهت Reeman اليوم ....

قد أنتهت Reeman اليوم من ....

قد أنتهت Reeman اليوم من ...

قد أنتهت Reeman اليوم من ...


الأنتحارات ( الأمتحانات يعني)

...........................................................

هي الأمتحانات خلصت أه .. بس الحمد لله مخلصتش على خير خالص

فبدل مخرجنا نقول( ختامه مسك ) قولنا ( ختامه زفت )

سليمان ( اللي بيقولو عليه دكتور الماده ) كان مٌصر أنو ينكد علينا في أخر يوم

الواحد مش عارف يقول إيه غير منو لله ..

.......................................................

بالنسبالي بأه قضيت أحلى يوم في حياتي أنهرده مع أحلى ( سداسي مرح )

خرجنا وأتفسحنا .. دا بعد مسلمت على كل أصدقاء الدفعه

.................................................

والحمد لله سنه ثانيه راحت لحلها...... واأخيراااااا بقيت في ثالثه وخلاص

هتخصص .... واللواحد هيحس أخيرا أنو كبير كدا

دايما بأحلم بحالي كبيرة
يمكن : لكي أخطط حياتي كما أريد
فأنا أستغرب من الكبار الذين يدير الآخرون لهم حياتهم !!!

........................................................

يارب تكون أجازه سعيده ... ويارب كمان كل اللي مخلصوش يخلصو بأه

الجمعة، 9 مايو 2008


فـاصل ونواصـل أو فـاصل ونعود بعد قليلا
أختاروا الصيغة اللي تريحكم المهم أني همتحن وأرجع أن شاء الله تاني
بس أنتوا أوعوا تنسوني من دعواتكم أنا وكل اللي بيمتحنوا أننا نعمل
في الأمتحانات كويس وتعدي علي خير
أسيبكم بقي وأقوم عشان خلاص مافيش وقت
الأمتحان بعد كمان يوم
وهما كلهم علي بعض
6 مواد همتحنهم
بسرعة بسرعة
وأرجع لبلوجتي علي طول
يله باااااااااااااااااااااااااااااااااااي لبلوجي الغالي ، وزواري الأعزاء
ملحوظه : بس الدعاء لو سمحتوا يكون بضمير ، ويتكثف علشان الحاله بيظه خااااااااالص

الاثنين، 28 أبريل 2008

الدنيا ربيع .. والجو بديع

HaPpY shAm eLnEsEm DaY

الأحد، 20 أبريل 2008

نبا عاجل ...



صرفت في كليتنا اليوم مكافاة التفوق عن الفرقة الأولى

قبل صرف المكافاة كانت الفرح والسعاده والبهجه منتشره على وجوه أصدقائي

كانو فرحانين جدا جدا ( بالظبط زي ماكانت الفرحه على وجوه لاعبين منتخب مصر لكرة

القدم لما فازوا بكأس الأمم الأفريقية ) وعلى ما أعتقد كدا الجمله اللي بتدور في أذانهم كلهم ( اخيرا

هناخد حاجه من الحكومه ، اللي يجيي من الحكومة فيدة ) وكلهم بلا أستثنائي أنا بيحلمو هيعملو إيه بالمكافأة

اللي بتحلم تجيب موبايل بدل موبايلها , واللي بيحلم يجيب لاب توب وغيرهم .. وغيرهم


لكن الصدمه الكبرى حصلت لما أتعرف ان المبلغ المفروض صرفه هو ( 60 جنيه ) فقط لا غير ..

أه والله ستين جنيه اه صح يعني خمسينايه ومعاها عشرايه ..


أما بالنسبالي انا فهم كويسين ده مبلغ كبيير

اهم حلويين دول حتى يساعدوا في مصاريف ( عيش الطابونه)


ملحوظة هامه:

كل اللي هيعلق على التدوينه دي ليه نصيب في المكافأه

الاثنين، 14 أبريل 2008

أستعنا على الشقى بالله ...



جدول الأمتحانات علق اليوم على جدران كليتنا .. فبمجرد تعليق الجدول دليل قاطع على
قرب الأمتحانات .. والغريب والعجيب أنني حتى الأن لم أبدأ محاضرات في أحدى المواد
وأيضا لم أحصل على كافة الكتب الخاصة بالمواد الدراسية.. (ولكن ما باليد حيله)
نحن ما علينا إلا أن ننفذ فقط ......

وده جدول أمتحاناتي :-

أولا العملي :

السبت 19/4/2008 ......... مبادئ تصنيف

الأحد20/4/2008 ........... Visual Basic

الأتنين 21/4/2008 ............ أجهزة عرض

الثلاثاء22/4/2008 ............ إنتاج رسوم تعليمية



ثانيا النظري:

الأثنين 12/5/2008 ....... مبادئ تدريس

الأربعاء 14/5/2008 ........ إنتاج الرسوم التعليمية

السبت 17/5/2008 ....... قراءات عربية

الأثنين 19/5/2008 .......... مبادئ تصنيف

الأربعاء21/5/2008 ........ أجهزة عرض

السبت 24/5/2008 ..........Visual Basic



الثلاثاء، 4 مارس 2008

النحاج يرفع ايده ... هيه

الحمد لله أنا نجحت ، لي ترتيب بس هقول عليه بعدين لما أعرف نتايج زميلي ، النيجه تقديراتها جميله بس أنا مفرحتش بيها زي مفرحت بأني جبت أمتياز في مادة د/ سليمان ( نوافذ) ياااااااااه الحمد لله ، أصل أنا بجيب في مادتو كل ترم بالكتير ( مقبول) بس الحمد لله الترم ده ربنا وفقني ، والدكتور كان قايل أن محدش جايب ممتاز إلا أتنين بس ( وأنا أهو واحده منهم ) ، هو بأه هيديني هديه ، وكمان هيديني الكتاب هديه ..
تقديراتي هي :-
علم نفس ( جيد ).... ( الحمد لله انها جت على قد كدا)
مكتبات شامله ( جيد جدا)... ( إزاي ؟؟؟)
إنتاج صور ( جيد جدا).... ( يظهر أن الدكتور كان نايم وهو بيصحح )
مراجع ( ممتاز)..... ( هو الأيام دي اللي ميذاكرش يجيب أمتياز .. عجايب والله )
E ( ممتاز)... ( طبعا : أبن الوز عوام )
نوافذ ( ممتاز )... ( بجد بجد بجد No comment )
ملحوظه :-
سعر الكتاب 25 جنيه

الأربعاء، 20 فبراير 2008

ليتني كنت عصفوره ...


كانت السما دى كلها هتبقى ملكى .. أنا لوحدى .. أطير وقت ما أحب و مكان ما أحب .. أغنى براحتى و أرقص في سمائي براحتى .. استخبى فى سحاباية .. و أخرج من سحاباية .. و أقف ما بين فروع الشجر..وأغصانها

كنت هصاحب عصفورات كتير .. نتفسح سوا و نطلع رحلات سوا ..

و لما الدنيا تمطر، كنت هأخرج أرقص فى المطر .. و أبِّل نفسى .. أحوش المية فى جناحاتى و أطرطشها دواير فى الهوا..

كنت هاخد بالى ما أقربش من الشمس .. و أعمل حسابى أسهر شويتين و أطلع أقعد مع القمر .. و نتفق نملى الكون نور و غُنا..

وكنت هصاحب فراشات .. بجناحات ملونة .. و نطير سوا .. ونلعب سوا ..

لما أبرد أنزل أتدفى فى حضن وردتى .. كل الوردات تبقى صحباتى .. بس وردتى حاجة تانية ..أنا و هى متفقين فى كل حاجة .. لازم كنت هأعدى عليها كل يوم .. تحكيلى و أحكيلها .. نحكى حواديت لغاية ما ننام سوى ..

كنت هعيش حياه حلوه بعيد عن الأزعاج والزحمه .. حياه أعيش فيها مرتاحه البال .. كل اللي هيشغل بالي أزاي أحصل على أكل انهرده ..

الأحد، 17 فبراير 2008

أستفتاحه

أنا المفروض كنت أكتب التدوينه دي الاول بس السرعه والتشويق للكتابة نساني أني أكتبها في الأول ..
شوفوا بقى البلوج ده أنا عملاه لسه أنهرده .. بالضبط الساعه 2.20 ظهرا ..
أما بالنسبه فعملتو ليه ؟؟ أنا عملتو ليه ؟؟
هو ده السؤال ؟؟
أنا بصراحه مش عارفه أنا عملتو ليه .. بس أهي فكره جاتلي كدا مره واحده قالتلي أعملي بلوج فأول مفكرت فيها قولت أجرب وأعمل بلوج
علشان ألاقي حاجة تشغلني على النت .. وأفتحها كل يوم .. وأهتم بيها
يمكن ده علشان أنا عندي وقت فاضي كتير .. وكمان علشان أنا بحب النت والكمبيوتر .. بس كدا
لا في حاجه كمان أنا عملت البلوج ده علشان أسجل فيه مشوار حياتي لعله يكون ذكرى جميله بعد ذلك.. وكمان قررت أكتب فيه بالعامية